आरसा...
आरसा असतोच एक आभास,
आपलंच प्रतिबिंब दाखवणारा.
आरसा असतो एक समतल पटल,
लांबी रुंदी खोली काहीच नसणारा.
आरसा असतो नितळ स्वच्छ पारदर्शी,
जे जसं असतं तसंच दर्शवणारा.
आरसा असतो खूपसा प्रामाणिक
हातचं काही न राखणारा ,काही न घालणारा.
चेह-यावरचा आनंद, ताण दाखवताना
स्वत: अलिप्त निर्लेप मोकळा रहाणारा.
खूप प्रतिमा येत जात असतानाही
प्रत्येक प्रतिमेशी तितकाच एकरूप होणारा.
आरशाला नसतो भूतकाळ अन् भविष्यकाळही
आरसा असतो अखंड वर्तमानात जगणारा.
एक साधी काच तिला पारा लावलेला,अपारदर्शक बनलेला
इतरांना संपूर्ण पारदर्शकता शिकवणारा ...आरसा.
बहिरंगाचे यथार्थ दर्शन नित्य घडवणारा,
डोकावणा-या प्रत्येकाला सावध करणारा.
तरीही कुठं तरी काहीतरी निसटून जातंय,
शोधतोय मी ..अंतरंगही दाखवणारा एक ... आरसा.
डॉ सदानंद चावरे
३०-११-२०२०
No comments:
Post a Comment