शाळा

शाळा मदीय स्मरते,नित्य हृदयांतरी|

खेळलो बागडलो इथे, मुक्त पाखरापरी ||१||

स्वजन मिळाले इथे, जिवलग मित्रांपरी |

स्वहित कळाले जिथे,सहज शिक्षणातुनी||२||

शिक्षक विद्वद्जन भेटले, अर्थ भरती अक्षरी|

ताडिले क्वचित कारणी,प्रेम अधिक देऊनी ||३||

सरता बाल्य शाळा सरली,उरली मनी साजिरी |

हृदयी नित्य भरते अजुनी,हळवी जाग राहिली ||४||

बोलाविते ती अजुनही, वर्षे बहु जाहली|

अंकी तिच्या वाटते,धाव घ्यावी खेळुनी||५||

डॉ सदानंद अरुण चावरे.

नूमवीय १९८४ दहावी अ.