क्षण..

क्षण...

घटिका पळे काळ चालताहे,सवे आपुल्या सदा नित्य धावे.

करावे कसे सार्थक या क्षणांचे,मनी मानसी प्रश्न ऊठताहे.

सुकृत कोणते कसे आकळावे,कुणास ठावे कुणा अनुसरावे.

सत्कर्म कार्या कसे उचलावे,अखंडित सत्कार्य कैसे करावे.

रंजन स्वजनांचे करीत जावे,निज व्यवसाय जपत असावे.

कण ज्ञानाचे मेळवीत जावे,सार्थक यांसी कैसे म्हणावे.

गप्पा टप्पा गणगोत जमवावे,हास्य विनोद फुलवीत जावे.

गेल्या क्षणांना कसे जुळवावे,अखंड समाधान कोठे मिळावे.

स्वर जीवनाचे कैसे जुळावे,समाधान चित्ती कसे उतरावे.

जग पाहता पाहता वीसरावे,अंतरी जरा मनहे स्थिरावे.

हरी कीर्तनी क्षणे ज्या खपावे,सद्गतीस त्याने जीवास न्यावे.

क्षणानेही जिथे विरून जावे,महद्भाग्य ऐसे समस्तां मिळावे.

जय जय रघुवीर समर्थ.

सदानंद चावरे पुणे

२५-६-२०२२

कृष्ण माझा गुरु

कृष्ण माझा गुरु, कृष्ण पैल पारू

भव सागरीचे तारू , कृष्ण माझा||१||

कृष्ण गगनी  मेघु,लखलखता वीज लोळू

मनी गुह्य विमळू , कृष्ण माझा ||२||

नामी नाम जपु , उमलून येई आनंदू

रणी गुरू राऊ, कृष्ण माझा|| ३||

अर्जुनासी सखा बंधु, भक्त कृपे सादरू

भव सागरा आवरू, कृष्ण माझा||४||

गीता अमृत वर्षावु, संत सज्जन उद्धरू

नीती न्याय दंडकु , कृष्ण माझा||५||

डॉ सदानंद चावरे पुणे