युद्ध

युद्ध...

सांगा मजला युद्धाने काय साधले

देश बुडाले उद्ध्वस्तच झाले.

||धृ||

शतकांचे संचित जळून गेले

संस्कृती चे कापही नुरले.

रस्तो रस्ती फिरत रहाती

ओळख पुसले चेहरे.||१||

घरे पडता मने कोळपली

अश्रूतर थिजून गेले

गतस्मृतींच्या आठवणींना

कवटाळून बसणे उरले.||२||

कोण फुंकितो शंख रणीचा

भाले फेकी मारी कोणी.

दोन्ही पक्षांत उरती

पार्थिवांच्या गोणी. ||३||

विजयी कोणी परास्त कोणी

कोण लिहीतो अभद्र वाणी.

लल्लाटीच्या भयाणरेषा

वाचू न शकतो कोणी.||४||

डॉ. सदानंद चावरे 

२६-०२-२०२२