युद्ध

युद्ध...

सांगा मजला युद्धाने काय साधले

देश बुडाले उद्ध्वस्तच झाले.

||धृ||

शतकांचे संचित जळून गेले

संस्कृती चे कापही नुरले.

रस्तो रस्ती फिरत रहाती

ओळख पुसले चेहरे.||१||

घरे पडता मने कोळपली

अश्रूतर थिजून गेले

गतस्मृतींच्या आठवणींना

कवटाळून बसणे उरले.||२||

कोण फुंकितो शंख रणीचा

भाले फेकी मारी कोणी.

दोन्ही पक्षांत उरती

पार्थिवांच्या गोणी. ||३||

विजयी कोणी परास्त कोणी

कोण लिहीतो अभद्र वाणी.

लल्लाटीच्या भयाणरेषा

वाचू न शकतो कोणी.||४||

डॉ. सदानंद चावरे 

२६-०२-२०२२

स्वप्नं

स्वप्नं...

स्वप्नं असतातच गोजिरी

स्वतःशी हितगूज करणारी.

स्वप्नातलं एक जग असतं

वास्तवापेक्षा हटके असतं.

स्वप्नात मिळते निराळी अनुभूती

मिळतो निराळा दृष्टिकोन.

स्वप्नात मन मुक्त असतं

तरल हलकं होत जातं.

स्वप्नं गुंगवून ठेवतात

संपू नये वाटतं.. तरी संपतात.

स्वप्नं झोपेला उद्देश्य देतात

अस्तित्वाला नवी मीती परिमाण देतात.

९-२-२०२२

सदानंद.