पूर्व क्षितीज

रक्त लालीमा 

पूर्व दिशेला

कोण उधळितो

गुलाल ताजा

अलगद पुसतो

अंधार रात्रीचा

कोण उजळितो

कुंद नभाला

सहज जाता 

नजर बाहेरी

कोण तोषवितो

मना मनाला

© डॉ सदानंद चावरे

२३-९-२०२०

engineers Day

अभियांत्रिकीच्या तज्ञांस.....

यंत्र निर्मुनी कार्य साधता

कष्ट जगाचे सुकर करता

प्रगतीचे नव विश्व घडवता

अधुनिकतेचा वसा घेऊनी

नव्या जगासी तुम्ही निर्मिता

प्रगतीचे सोपान घडवता

कल्पना ज्या मानव करितो

प्रत्यक्षामधे तुम्ही आणता

वंदनीय ही कृतीशीलता

शास्त्र तंत्रज्ञानी मिसळुनी

उपयुक्ततेचा ध्यास घेता

अर्थ निर्मिता कार्य निर्मिता

रथ विश्वाचा गतीमान करता

Happy Engineer's Day

©Dr. Sadanand Chavare

मागणे

मागणे...

हाता मधे टाळ दे

मुखासाठी नाम दे

देवा तुझ्या भक्तीसाठी

थोडा तरी भाव दे

राम नामी ठाव दे

चित्ती समाधान दे

संघर्ष हे पेलण्याला

थोडे अवसान दे

वृत्तीचे रे भान दे

बुद्धीचेही दान दे

झिजण्यासी कुडीला तू

चंदनी वरदान दे

संकटांसी मात दे

थोडासा श्र्वास दे

त्रासलेल्या माझ्या लोकां

आरोग्याचा घास दे

© डॉ सदानंद चावरे

९-९-२०२०

मैत्री

मैत्री

मैत्री म्हणावे कशाला

कशी भेट होई

कोणती वेळ कधी

जुळूनी येई

फळापरी मैत्री सुद्धा

परिपक्व होई

संवेदना सहवेदना

बनुनी जाई

कधी गप्पांचे फड

कधी गाण्याची लकेर

जीवन संगीत

फुलवून जाई

वाट चालता चालता

महावाट होई 

प्रवास सुखाचा

घडवून जाई

डॉ सदानंद चावरे

३-९-२०२०